اصبحنا من المتسولين في كل مكان، شكلنا بقي وحش اوي علي المستوي الدولي وفي كل الدول العربية اللي يكرمك يا مسئولي الدولة واخدين الشنط ورايحين ومتجهين بأذن الله الي دبي وممكن نلاقيه اتغير في اي لحظة ما هيها سلطه فين ما نحط يكون معسكر المنتخب القومي الاول صاحب الثلاث بطولات قاريه الله يرحمهم زي ما يرحم الثورة المصرية مش عارف اذا كانت ماتت ولا لا.

بدل ما كنا بقعد ونحط رجل علي رجل في اللعب لمباريات قوية ودية رسمية للتأهل لكاس الامم الإفريقية وكاس العالم البرازيل ٢٠١٤ اصبحنا كعب داير عارفين كعب داير يعني ايه اسئلو وزير الداخلية اصل منتخبنا والحمد الله اصبح فعلا ليس له وطن بيلف علي كل مدريات الامن علشان نعرف اذا كان عليه احكام قابلة للتنفيذ.

واعتقد ان المنتخب بفعل مسؤولي الدولة مليان احكام وبلاوي سوده بدل ما نلف بمنتخبنا كل محافظات مصر علشان القومية والوطنية والانتماء الا بقالنا حوالي ٦٠ سنه نسمع عنه بس واضح ان مسؤولي الدولة لسه ما وصلهمش يعني ايه انتماء، اهم حاجه ان دماغهم تكون رايقه وصافيه من بلاوي التشجيع ويقعدو علي الكراسي شويه بدل ما يجيلهم استجواب من سيد قراره وعلشان ايه بقي لا يبقي الباب الا يجيلك منه الريح سده واستريح هو ده منطق الحكومة.

ابعد دلوقتي عن اي لغم طالما هنتبهدل في المجلس ونقعد نسمع في شويه اعضاء منتخبين وطيب وعلي ايه يولع المنتخب المصري ونتسول عادي ونلف كعب داير علشان يعرفو احنا مين ما هو لازم الشعب ده يعرف قيمه الحكومة المصرية بتاعة الدكتور كمال.

والله كل شي تم علي ما يرام كوارث ماشيه ممتاز، السياحة طبعا "نمبر وان" علشان التسول زاد بتاع المنتخب والدنيا متعطلة علي الاخر الاقتصاد بدا ينمو بشكل الحمد الله كل الشركات والمصانع شغاله موووت بجد حاجه تفرح والماكنة بدأت تدور كويس في كل القطاعات مع ان الحاجه الوحيدة اللي شغالة بدون توقف غصب عن الحكومة هي هيئة قناة السويس ولو مدو ايدهم فيها والله لاتعطل وكانت هتعطل بشويه مشاكل بعد الماتش بس نحمد ربنا ان السادة المسؤولين ما وصلوش هناك ولا كانت خربت.

معلش انا بعتذر، نرجع تاني للمنتخب المصري ومباريات الخارج، طبعا شيء جديد جدا علينا وسؤال حال الشارع المصري لامتي مصر هدنها كده هيا مصر رخيصة اوي عند الناس ديه مش لاقين ملعب في مصر مش لاقين ناس تآمن مش لاقين حد يلعب معانا مش لاقين دوري او كاس او اي نشاط نلم نفسنا فيه بذل الشحططه وقله القيمة مع الأخوة العرب.

كان في مثل مصري قديم اذا كان حبيبك عسل ما تلحسوش كله، والله انا خايف جدا حتي الدول العربية ترفض بعد كده استضافه المنتخب المصري، اصل الموضوع زاد عن حده وبقينا مرخصين نفسنا وشكلنا وصل لمرحله التسول الخارجي اهو احسن من الداخلي ده بالعملة المصرية والتاني بالدولار، بجد ارحمونا وارحمو البلد ديه .. الله ينتقم منكم.