مبارك علينا جميعا عودة النشاط الرياضي الكروي والمعروف رسميا بإسم الدوري المصري .

ولأننا مع بداية سنة جديدة – سعيدة – علينا يا رب ان شاء الله احب افكركم بشوية حاجات لم تروها في العامين الماضيين نظرا لتوقف النشاط الرياضي الكروي في مصر وعندما بدأ الجميع يتابع – الدوريات العالمية – ويعرف اسماء اللاعبين والفرق والمدربين وحتى الحكام .

وقبل ان تصاب بصدمة العودة الى ارض الواقع مرة أخرى فعن نفسي أحببت ان اقدم لكم اهم ما ستشاهدونه خلال الأيام القادمة بعد عودة – البطولة الأم – للبطولات العربية والأفريقية – الدوري المصري .

بما أنك كنت تتابع الدوري الأنجليزي والأسباني والألماني فطبعا ما كنش ممكن ابدا تلاقي بعد المباراة مباشرة لاعيب داخل في مداخلة تليفونية مع قناة – يورو سبورت مثلا – والمذيع بيقوله – كنت هايل النهاردة يا كابتن – وهو يرد عليه – الحمد لله يا ابو الكباتن انا كنت عايز اوصل رسالة للجميع اني الحمد لله بخير !!!

وطبعا مش ممكن ابدا تلاقي في الدوري الألماني مثلا .. بين الشوطين حوار مع طبيب فريق – بايرن ميونخ مثلا – والمذيع المحترم بيسأل الطبيب عن خطة اللعب في الشوط الثاني حتبقى عاملة ازاي ؟؟؟

واكيد مش حتلاقي عضو اتحاد الكرة الأنجليزي بيقدم برنامج هناك فبيتصل بعضو الأتحاد التاني اللي هو زميله يعني ويسأله على الهوا عن اجتماع الاتحاد القادم وايه القرارات اللي متوقع انها تتخذ خلال الأجتماع وطبعا اوعى تنسى الجملة – القذرة الشهيرة – طيب عايزين انفراد كده يا فندم ؟؟

واكيد عمرك ما حتشوف مذيع كان بيلعب في فريق مانشيستر يونايتد مثلا طالع في القناة اللي هو بيشتغل فيها بيقولك ان المعلنيين مش عايزين يعلنو عندي في البرنامج علشان هما بيشجعوا مانشيستر سيتي !!

ومش ممكن ابدا تلاقي فورا بعد المباراة لقاء من داخل الملعب مع المدير الفني للفريق ويقولك انا عملت وسويت وروحت وجيت وفي الاخر تسمع الموشح المعتاد – تحياتي لحضرتك يا كابتن ولكل اللي معاك في الاستوديو – هو مين اللي معاك – يقوله فلان – حبيب قلبي والله يا ابو الكباتن !!!

واكيد افتقدنا كلنا التحليلات العبقرية اللي كانت غايبة عننا لمدة سنتين مثل – فريق برشلونة محتاج أسطة في وسط الملعب مثلا – برشلونة محتاج أسطة ....!! ماشي

ياه ... ذكريات كثيرة مختلفة تماما وانت تتابع الدوري المصري فنحن نختلف عن الأخرون في كل شئ فلا يمكن لك ان تشاهد ما تشاهده في الدوري المصري او القنوات الرياضية المصرية في أي مكان اخر في العالم ..

الدوري المصري ... أم الأجنبي !!!

للتواصل مع الكاتب عبر فيسبوك إضغط هنا