القدرة علي أن تكتب عن كل خطايا المجال الذي تعمل فيه إما أن تتخلي فيه بثوب الناصح الوحيد أو أن تترك لنفسك العنان لتعبر بصدق عما يدور بداخلك ولكن في هذه الحالة لن يكن مقبولا أن تري كلمات أحسن ما فيها هو ألا تقرأها بالأساس.

الحلواني لا أعرف إن كانت هذه مهنته الأصلية أم أنه إسمه فقط ..دائما ما أنصت إليه كلما تكلم رغم بيئته البسيطة وكلماته الأبسط والذي يعبر فيها دون مواربة وبقدرة أعلى من كتاب كثيرين ومحللين كثيرين ..لذلك قررت أن أضع مغامرتي مع الحلواني بين أيديكم وأسمحوا لي أن أكتب بنفس طريقة تحدث الحلواني.

ينفع كده يا بيه .. بدأ حديثه الغاضب معي كعادته بمجرد رؤيتي ليستغل فرصة الحديث معي عن أحوال الكرة ..أجبته مالك بس يا عم حلواني ..فيكمل أنا مبقتش عارف الراجل سانن سيفه علينا كلنا وعمال يخبط شوية في عمر جابر وشوية في الصحفي اللي إسمه الشرقاوي.

قلتله مش خايف يا حلواني ..قالي يا باشا الأرزاق علي الله ..إيه هيعملي سي دي فيه سر الخلطة بتاعة الكنافة ولا البسبوسة ..بذمتك عمال يتكلم عن الأخلاق وأبصر إيه وهو عامل زي المثل الشعبي اللي بيقول .. إسمها إيه دي تلهيك واللي فيها تجيبه فيك .. أحمرت وجنتاي بسبب أنه قال الكلمة كما هي في حاراتنا الشعبية .قالي إيه زعلت أوي ..القصد ..الراجل ده سايبينه ليه علينا كل شوية يطلع يقرفنا شوية عفاريت وشوية عمل أسود وشوية وشوية.

قلتله طب إيه رأيك في موضوع الإستاد .. إهتز كرشه المتدلي رغم المريلة وقال أهو ده بقي يتقال عليه ..قلتله لا أبوس أيدك من غير أمثال ..نظر لي مرة أخرى وكأنه غاضب من عدم إكماله المثل وقال يعني هو عشان فكرة يقعد يطلع عين ..قاطعته ½ بسبوسة يا عم الحلواني ..قالي من عينيا.

قالي هما يا باشا فاكرينا هبل ..هما بيطلعوا ويعملوا الشويتين دول علينا شوية بلاغ لنائب عام وشوية مش هنجيب إسمه وشوية مش عارف إيه وبعد كده يرجع تاني ويعمل بيان ولا صلح مؤقت وده يبوس فوق رأس ده والموضوع يكمل علي خير وأهو كله زيتنا في دقيقنا.

قلتله مش فاهم ؟.. أكمل عم الحلواني كلامه وهو يعطي لي خرطة من الحرف كما أحبها ..دوق دي يا باشا ..وكأنه يريد أن يكمل كلامه دون ان أزعجه فقررت أن استمع للحلواني وأستمتع بالبسبوسة ..وأكمل حديثه يا إبني الناس دي بتشغل الهوا بس وفاكرة إن الناس فاضيالهم ..أنت عارف الواد إبن إبني يقعد يكلمني علي ميسي ورونالدو وشوية عيال كده جامدة وأقوله بتتفرج عليهم فين دول يا واد ..يقولي في الوصلة أو ع النت مبقاش حد فارق معاه دوري ولا كأس أصلا إلا قولي يا بيه هي الناس دي معندهاش أهل يسألوا عليهم.

قلتله مين يا حلواني ؟.. قالي الناس اللي واخداها فحت وردم في الأستوديو بيقعدوا أربع وخمس ساعات ..قلتله إعلانات يا حاج بقي وكل سنة وأنت طيب ..قالي آآآآآه هي الفولة كده ..وصمت برهة  وأخذ طلب ثان من زبون وأصر علي أن يكمل الحديث معي بعد مهلة من التفكير.

يعني هما يعملوا شوية هجص واحد يجي يشتم وواحد مش عارف بيتكلم عن اي ماتش والواد اللي ماسك ميكروفون عمال يلف علي اللعيبة والمدربين بعد الماتش ويقولهم إحساسكم إيه بعد الماتش .. هيكون إحساسه إيه يعني واحد طلع عينه بيجري بقاله ساعة ونص اكيد ركبه بقت سابيه وعاوز ياخد حمام.
 
قلتله هو يقصد يا حاج إحساسه إيه بعد الفوز أو الهزيمة ..قالي ما شاء الله ..أبو التعليم يا أخي واحد كسب هيكون شعوره إيه ؟بيعيط!!!.. وواحد خسر هيعمل إيه؟  هيرقص !! .. قلتله هاخد الطلب بتاعي إمتي.

قالي مستعجل أوي يا أخويا مش إستني لما أسالك البسبوسة حلوة ولا لا ..إشمعني أنا يعني ما أعمل فيها مذيع تصدق فكرة ..أجيب الكبشة واحط عليه فوطة وأي حد جاي ياخد حاجة من المحل أديله حتة وأقوله إيه شعورك بعد ما أكلت ..والله يا جدع الناس دي هتهبلني وبكره يقولوا عمك الحلواني دخل المرستان.
 
والنبي يا باشا لا توصل الكلمتين دول لحسن إحنا دمنا محروق أوي ..هو حال البلد ناقص عطلة مش كفاية زحمة المرور أنا بحس أنهم مزنوقين في الاستوديو ده ومش كل ما يجوا يتزنقوا يتخانقوا مع الراجل بتاعهم ويرجعوا يطلعوا علينا قرفهم.

قلتله عاوز كام يا حاج ..قالي زي كل مرة انت بترط في الكلام ليه النهاردة ...ثم ضحك مرة أخري وضحكت معه ثم غادرته مفكرا هل الحلواني أكثر قدرة علي فهم الفولة كما يحب أن يقول ..بالتأكيد نعم.

للتواصل مع الكاتب على الفيس بوك