اللقطات اللي وخدنها .. كلها طبيعية .. والأبطال انا وانت وهي .. انا وانت وهي .. خلي خلي بالك حنصور وانت ولا على بالك.

هكذا كانت مقدمة ( الكاميرا الخفية ) في زمن الكاميرا الخفية الجميل وتقريبا احنا كنا عايشين في كاميرا خفية لمدة اربع سنوات من بعد الفوز بكأس امم افريقيا للمرة الثالثة على التوالي ( 2010 ) وعينك ما تشوف الا النور يا معلم .

ثورة وعملنا ... جالنا رئيس  ( او هكذا اعتقدنا ) وبعدين لبسنا في بعض احنا وجماعته ( ربنا ينتقم منهم ) وشيلناه .. نزل الشعب علشان يعبر عن رأيه في انه الرئيس لازم يرحل في 30 يونيو .. مشي الرئيس الوحش وجماعته وجيه ( الحبوب ) رئيسنا  الحالي .. كل ده في اربع سنين .

بس ما صعدناش كاس العالم .. ولا صعدنا لأمم افريقيا من ساعتها قوم ايه بقى برنامج الكاميرا الخفية بتاع الواقع بتاعنا .. نلاقي فيه السيد سمير زاهر يتحدث عن تطوير الكرة في مصر !!!

اه وحياة ربنا كان بيتكلم عن تطوير الكورة في مصر وخلو بالكو بقى ان زاهر و ( برايز ) هما اللي كانوا بيديرو الكورة قبل كده برده ولا دخلنا امم افريقيا ولا دخلنا كاس العالم .

على الجانب الأخر بقى .. في الكاميرا الخفية .. العادلي ورجال الداخلية خدو براءة ( هاهاهاهاهاهاهاهاهاهاهاها ) اه والله خدو براءة .

قوم ايه ...حسين سالم يتكلم في التليفون ويقولك ( تحيا مصر ) بلدي حبيبتي وراجع لبيتي ولسريري راجع لفوطي وبشكيري .. وكده يعني .

برايز .. يحاول ارجاع حسن شحاتة علشان يبقى مدير فني مرة اخرى لمنتخب مصر ... اه والمصحف .. مهو ليه تحاول تغير لما ممكن ترجع القديم .

في الجانب الأخر من الكاميرا ... اسماعيل الشاعر يتجه الى العمل الخيري !!! وجمال مبارك بيتصور سيلفي !! وشوية لاعيبة كورة بينزلو صورهم وهما مع الرئيس المخلوع او ولاده وهما فرحانين اوي .

سمير زاهر .. يقول بعد ما فترة الاتحاد تخلص ممكن افكر في نزول الانتخابات ؟؟

حسني مبارك براءة ( عادي على فكرة واوعى تكون كان عندك شك في لحظة انه براءة ) !

أحمد عز يعود الى مصانعه ويقول انه سينشأ حزب جديد ( ما عرفتكش انا كده ) .

الشباب ينزل الميدان .. يهتف .. يزعق .. يشتم .. يرجع على البيت ويسكت ويتعامل مع الوضع .

المتحدث الرسمي باسم اتحاد الكرة ( حمد الله على السلامة يا كبير يا رئيسنا ) قصده على حسني مبارك !! عادي حقه .

سمير زاهر .. اتحاد الكرة يدير الكرة في مصر بحرفية شديدة وهم ناس عارفين شغلهم كويس جدا !!

رئيس جهاز امن الدولة برئ من كل ما نسب اليه .. عودو الى أماكنكم !!

انفخ البلالين يا زناتي .. فنحن نحتفل بالعودة الى الماضي !!!

المشكلة بقى ان السؤال الأهم في الكاميرا الخفية لم يتم توجيهه لنا جميعا ( عايز تذيع .. قول ذيع .. مش عايز مش حنذيع !!

احنا قلنا .. مش عايزين نذيع .. بس احنا برده حنذيع !

انفخ يا زناتي !!!

للتواصل مع الكاتب عبر فيس بوك