اتكلمت  وقلت اللي انت عايزه ؟ قلت شهادتك امام الله والتاريخ ومش عارف ايه اللي انت كتبته ده ؟؟ طيب ارتحت دلوقتي ؟ ضميرك مرتاح يعني ؟

عايز تهوهو تاني ؟؟؟

ثانية واحدة يا فندم .. ايه ( أهوهو ) ديه بعد إذنك ؟

لا

 يا ابني مش قصدنا حاجة قصدنا هل محتاج تعبر عن اللي جواك تاني يعني عايز تقول ان البلد ماشية بالعكس وان فيها سلبيات كتير يعني .. هوهو !!

حضرتك لو عايز تقول ان ما حدش اتحاسب وما حدش حتى طلع مسئول عن مذبحة الدفاع الجوي بعد ما كلنا كنا عارفين تقريبا اسباب المشكلة دلوقتي بدأنا نسال هو اصلا كان فيه مشكلة ولا  لا .. حضرتك عايز تقول الكلام ده .. هوهو !!

حضرتك لو عايز برده تفك بكلمتين كده  عن ( الرئيس وعن الحكومة ) من حقك يا فندم احنا عايزين  نسمع الصوت التاني عايزين نسمع ( الضمير ) الصاحي في البلد علشان نبقى عارفين مين اللي لسه بيهوهو !!

حضرتك مصمم انك تقول ان البلد  محتاجة وقفة من نوع مختلف ومحتاجة ان احنا نحارب فساد في الشرطة وفي القضاء وفي مؤسسات الدولة كلها عادي يا فندم من حقك تقول كل الكلام ده .. هوهو !!

مش مشكلة خالص على فكرة ان حضرتك برده تبقى مصمم على رأيك وتقول انك بتعارض من اجل المصلحة العامة وليس لأي شيء اخر وعادي جدا ان احنا نسمع منك الكلام ده ونعتبرك (  مواطن عادي يعني ) بيتكلم عن رؤيته وعن نفسه وعن احلامه وعن شباب تانيين عادي .. هوهو !!

عادي برده ان ( مورتا ) يطلع ويقول الواد فلان الفلاني ده اللي راح قابل الريس وقاله العيال بتوع الاولتراس دول شباب مصر ولازم نتعامل معاهم وهو يفضل يشتم فيك وفي الشباب دول وفي أي حد تاني وحضرتك .. تهوهو !!!

حضرتك برده ممكن ترفض انك تكون صفر على الشمال .. وتقول لا حنفضل نبني في البلد ديه لحد اما نموت وحنفضل نقول للناس فيه امل لحد  لما نموت .. وحنفضل نحاول ونحفر في الصخر .. علشان خاطر بلدنا وعلشان خاطر عيالنا وعلشان خاطر شبابنا .. عادي حضرتك .. اعمل كل ده واحنا كمان ممكن نقولك ( برافو ) عادي يعني هوهو !!!

حضرتك ممكن برده تقول ( الدم كله حرام ) والكلام الظريف ده وان لازم نحافظ على دماء الشعب زي ما بنحافظ على دماء الجيش والشرطة لأن الدم كله حرام .. حنسأفلك على فكرة المرة ديه .. ونقولك برافو عليك جدا صح جدا ... هوهو !!!

اه .. نسيت اقولك على أهم رسالة ليك النهاردة ؟؟
ايه يا فندم ؟

انت ممكن تعمل كل اللي فات ده كله .. واحنا حنسمع ونشوف واحيانا حنرد واحيانا تانية حنأيد واحيانا تالتة حنساند واحيانا اخرى .. ممكن نتبني اللي انت بتقوله ده لكن تيجي لحد ( اجراءات .. وحساب .. ومين المسئول ) ثانية واحدة

شوفت ماكس ؟؟

اه شوفته يا فندم ...

خلي بالك .. اصله بطل يهوهو !!!!!!!!!!