اليوم طويل شاق لقد انهزمنا من المقاولون وتقريبا انتهى حلم المنافسة على لقب الدوري ولدينا مباراة صعبة امام بطل المغرب في دوري الأبطال .. يا إلهي .. ماذا افعل ؟؟

جرس التليفون في منزل جاريدو يرن الساعة الرابعة فجرا بتوقيت القاهرة .. جاريدو منزعجا ( يا إلهي .. من يتصل بي في هذا التوقيت وفي هذا اليوم ؟ )

المتصل : الو جاريدو انا محمود طاهر .. انت نمت ؟

جاريدو : مستر طاهر أهلا وسهلا لا نمت ايه انا كنت قاعد بحضر خطة مباراة بطل المغرب والخطة اللي حنلعب بيها يا مستر .

طاهر : خطة ايه ؟ هو ايه النظام بالظبط في الفرقة ديه يا جاريدو ؟

جاريدو : مش فاهم مستر طاهر تقصد ايه ؟

طاهر: ايوا يعني انت معندكش مسئول عن الكرة يتكلم معاك ويشوف ايه اللي بيحصل في الفرقة بتاعتك ديه ؟

جاريدو : مستر طاهر صباح خيرات .. انت مش معين علاء عبد الصادق مسئول عن الكرة ؟

طاهر : اه صحيح .. نسيت والله .. هو علاء عامل ايه ؟

جاريدو : الحمد لله هو مع المحترف البرازيلي في المستشفى من امبارح ؟؟

طاهر : ليه في المستشفى ليه ؟

جاريدو : مش عارف والله مستر طاهر تقريبا عنده إسهال ؟

طاهر : سلامته الف سلامة .. المهم بقى .. انت ناوي تعمل ايه في الماتش الجاي ان شاء الله .. خلي بالك الضغط رهيب عليا ولازم نكسب بطل المغرب علشان هي مش ناقصة هبل .

جاريدو : طيب افرض اتغلبنا مستر طاهر ( ديه كورة يعني )  ممكن يحصل .

طاهر : حبقى مضطر اني اقيلك من تدريب الفريق يا جاريدو.

جاريدو : اوه مستر طاهر .. يعني هي اول مرة نخسر ؟؟

طاهر : ايوا بس ديه بطولة افريقيا يا عم الحاج !!

جاريدو : طيب ما شكل الفرقة في الدوري ( عار ) من زمان والناس كلها بتقولك ماشييني وانت ( واقف وقفت راجل ) !!

طاهر : لا مهو بعد الخروج من افريقيا مش حيبقى فيها رجولة يا جاريدو !

جاريدو : طيب افرض كسبنا ؟

طاهر : يبقى حنقعد ونشوف بعد كده ايه اللي حيحصل

جاريدو : انا معايا علاء عبد الصادق على الخط التاني ادخله يتكلم معانا ؟

طاهر : اه

جاريدو : مستر علاء اهلا معايا مستر طاهر على الخط التاني حنتكلم احنا التلاتة

علاء عبد الصادق : تلاتة ؟؟؟ احنا اتغلبنا تلاتة ؟؟

طاهر : تلاتة ايه يا علاء اتغلبنا واحد من المقاولين

علاء : امال ايه تلاتة ديه ؟؟

جاريدو : مستر علاء ( صباح الفل ) بقولك حنتكلم احنا التلاتة

علاء : ايوا يا اخي خضطني !!

طاهر : ايه يا علاء .. شكل الفرقة مش عاجبني خالص ولا عاجب حد

علاء : ولا عجبني انا كمان والله يا باش مهندس ولا عاجب حد خالص

طاهر : ايوا يعني انا اكلم مين ان شاء الله لما معايا المدير الفني والمسئول عن الكرة في النادي والأتنين عاملين من بنها ؟؟ اكلم انا مين ؟

علاء : والله يا باش مهندس الأمور كلها ضدنا مش عارف ده سوء حظ ولا غباء من الأخرين .. لكن احنا شغلنا زي الفل !!

طاهر : فل ازاي يعني انت عارف ان اول الدوري فارق عنا ب 11 نقطة ؟

علاء : فعلا ؟؟؟

طاهر : اه والله

علاء : انت يا جاريدو .. انت مش كنت قايلي انهم 8 بس ؟؟

جاريدو : علاء حبيبي ده قبل ما نخسر النهاردة ؟

علاء : ايه ده هو احنا خسرنا النهاردة ؟

طاهر بصوت ( غسان مطر ) : الله

علاء : ايه يا باش مهندس معلش كنت في المستشفى مع الواد البرازيلي اللي احنا اشتريناه ده

طاهر : اه والنبي وايه حكايته ده كمان ؟

علاء : الواد زي الفل يا باشا .. الإعلام بس هو اللي مركز معانا والزمالك بيكسب بالحكام والناس كلها ضدنا

طاهر : انا سمعت الكلام ده فين قبل كده ؟

علاء : ايوا ده الكلام اللي كان بيقولو المنافسين علينا ( اشمعنا احنا يعني ) ؟

طاهر : ايوا يعني عندك حل للمشكلة اللي احنا فيها ديه ولا ايه النظام معاكم انتو الاتنين ؟

جاريدو : مستر طاهر انا عندي الحل .. ؟

علاء : فعلا !!

جاريدو : ايوا مستر علاء ومستر طاهر انا عندي الحل ....................... 

 طاهر : حل وسطك انت وهو ... اقفلو السكة انتو الأتنين مهو لو عندكم حل كنتم عملتوه .. ودتوني في داهية .. ربنا ينتقم منكم .. ربنا ينتقم منكم .. وقفل السكة .

علاء : ولا يا جاريدو .. هو اتشل ولا ايه ؟

جاريدو : والله مستر علاء مش عارف .. انتو عندكم في مصر بتتشلو لما تتنرفزو ؟

علاء : ساعات ده بيحصل بس لما يكون فيه مشكلة كبيرة يعني ؟؟ هو احنا عندنا مشكلة يا جاريدو ؟

جاريدو : مشكلة ايه حبيبي .. احنا زي الفل

علاء : امال ايه حكاية ال11 نقطة دول اللي انتوا بتتكلمو عنها ؟؟ هو بطولة افريقيا فيها نقط !!!!!!!!


عليك الأن كمشجع اهلاوي ان تحاول جاهدا ان تجد حل في هذه المعضلة التي يمر بها الأهلي لأول مرة منذ سنوات بعيدة ( الكل يسبح في اتجاه مختلف تماما ) الكل لا يفكر في اسم الكيان .. الذي صنع كل هؤلاء .. وهذه قد تكون المرة الأولى التي لا يكون ( الأهلي فوق الجميع ) داخل النادي الأهلي .. الأن عليكم انتم ان تتوقعوا الحل .. وكيف سيكون
ملاحظات توقع السيناريو القادم  :
بلاش شتيمة فيهم هم التلاتة .. شكرا !!!!