شاهد كل المباريات

إعلان

سامر يوسف

في المشكلة الصلاحية-الميلنرية: (مقالة كوميدية بلسان مشجع درجة تالتة لصلاح وليفربول)

جميع الاراء المنشورة تعبر فقط عن رأي كاتبها وليست بالضرورة تعبر عن رأي الموقع

فوجئنا كلنا كمصريين لما صلاح جاب بنالتي لليڤربول في ماتشهم مع كارديف  سيتي بمجهود فردي ومسك الكورة علشان يشوط البنالتي بالواد ميلنر بشكله الكئيب ده بياخد منه الكورة بالعافية وبمنتهى الجليطة اعتماداً على كونه كابتن صلاح وأكبر وأقدم منه في الفريق بكتير، والواد صلاح حبيبنا يا ولداه انكسر وحط وشه في الأرض وأخد على خاطره. وفعلاً ميلنر شاط البنالتي وجابه جول وخد التسقيف والتهليل كله لنفسه، حار ونار في جتته.

واللي يزعل بجد إن صلاح في ماتش ليڤربول مع بورنموث قبل كده اتنازل عن جائزة أحسن لاعب في الماتش اللي كسبها بجدارة واستحقاق بعد تسجيله لهاتريك في الماتش ده للواد الندل ميلنر نفسه لأنه كان يوميها بيلعب ماتشه رقم 500 مع ليڤربول. كانت حركة چنتله حلوة من أبو صلاح العترة، بس طلعت خسارة فيه قليل الأصل ميلنر ده. 

وصحيح إن ميلنر هو الاختيار الأول لتسديد البنالتيات في ليڤربول، لكن صلاح هو اللي جاب البنالتي ده بمجهوده، وبينافس دلوقتي بشدة على لقب هداف الدوري مع كذا مهاجم جامدين قوي، والنتيجة كانت 0/1 مش تعادل يعني، وصلاح شاط بنالتيات قبل كده وميلنر في الملعب. وماكانش ينفع إن ميلنر يخطف الكورة من صلاح بالعافية كده باعتباره كابتنه. دي حاجة ماينفعش تتعمل مع نجم الفريق الأول. الطريقة كانت سيئة وماكانش فيها مراعاة لكون صلاح لسه مستبعد من قائمة الأفضل في الدوري الإنجليزي الموسم ده وهو اللي كان فاز باللقب ده الموسم الماضي، وبالتالي الجول ده كان هيفرق معاه كتير معنوياً، وده طبعاً هيصب برضه في مصلحة الفريق ككل في سباقه المحموم مع مانشستر سيتي للفوز بلقب الدوري بعد سنين طويلة من الغياب.

واللي يجنن إن ميلنر أصلاً كان احتياطي في الماتش ده وماكانش هيلعب لولا إن فابينيو الاحتياطي برضه اتصاب بعد ما نزل الملعب على طول فلعب بداله. والبنالتي ده اتحسب بمجهود أبو صلاح بعد أربع دقائق بس من نزوله.

عموماً حبيبنا صلاح كان محترم ومحترف بجد زي عوايده، وماعملش مشكلة واحتفل مع ميلنر وزمايله كلهم بعد تسجيل البنالتي، لكن أول ما الحكم صفر بنهاية الماتش خرج على طول جري على أوضة اللبس وما احتفلش في الملعب ولا شفناه بيحضن كلوب ويضحك زي كل ماتش. وأكيد يا ولداه دخل يجتر أحزانه جوه الأوضه لوحده، وتلاقيه كان بيقول هو أنا هالاقيها منك يا ميلنر ولا من مانيه المنفسن.

وعموماً بعد كده حصل غزو مصري وعربي لصفحة ميلنر على تويتر وده العشم برضه، وكل الكومنتات كانت بتتهمه بالأنانية ونكران الجميل مع صلاح. لدرجة إنهم عملوله هاشتاج مخصوص بيتهمه بالأنانية موجود عليه أعداد ضخمة من المشاركات وهو: SELFISH_MILNER#

لكن في النهاية لا أعتقد إن الموضوع البايخ ده تأثيره هيمتد للماتشات الجايه وهيعدي، خصوصاً وإن أبو صلاح جدع وابن بلد وقلبه طيب. وبإذن الله ربنا هيكرمه ويجيب أجوال تانية كتيرة في الماتشات الجاية ويحافظ على لقب هداف الدوري الإنجليزي للموسم الثاني على التوالي، ويارب كمان مانشستر سيتي يتكعبل في الماتشات الجاية وليڤربول يفوز باللقب الغائب عنه من موسم 89-90 يعني من حوالي ثلاثين سنة.

 

0

إعلان

أخبار تهمك

إعلان

إعلان

التعليقات

`14

خطأ لصالح متولي مدافع الإسماعيلي ضد رمضان صبحي