من المدرج: يا ريس ... شوفت العصفورة !!!

اياك ان تتخيل ان  نظرية ( شوفت العصفورة ) هي خاصة فقط بالألعاب السياسية والرياضية فقط في بلادنا الحبيبة .

فبلادنا الحبيبة وناسها الطيبين .. عندهم مبدأ واحد يسيرون به في دروب الحياة هو مبدأ ( شوفت العصفورة ) وأول ما تلاقي حدث ( ليس ذا قيمة ) بدأ الكل يتكلم عليه بشكل مبالغ فيه فاعلم تماما انه من جراء نظرية ( شوفت العصفورة ) ؟؟

فمثلا .. فجأة يكثر الحديث عن انتقال فلان الفلاني الى النادي العلاني وبعدها يبدأ النادي الأخر يصرخ لا والنبي اللاعيب ده ماضي لينا او احنا متفقين مع النادي بتاعوه وبعدين ندخل في قضية ( رغبة اللاعب ) والكلام اللطيف ده بس صدقوني كل ده في اطار نظرية ( شوفت العصفورة ) !!

وبعد شوية يطلع رئيس نادي مش عارف ايه يقولك انا مش حبيع حد من لاعبتي للنادي اللي مش عارف مين علشان الاحتقان ( اه والله هو بيقول كده ) وفجأة تلاقي ان اللاعيب ده بردو راح النادي اللي مش عارف مين وخد بقى فيها كلام أسبوع على ايه اللي حصل وحصل ازاي وليه حصل ( شوفت العصفورة ) !!!

وعلى جانب أخر .. هي قائمة السنة اللي جاية بقى 30 ولا 25 لاعب ويجي رئيس نادي مش عارف مين يقولك لو فضلت 25 انا حنسحب ولو بقت 30 بردو حنسحب ويبدأ الناس تتكلم والصحافة تكتب والدنيا كلها تركز ( شوفت العصفورة ) !!!

وبعدين تلاقي بقى منتخب مصر بيلعب ماتش ( فجأة كده ) في تصفيات أمم افريقيا والحديث يتحول الى هو فيهم كام لاعيب اهلي وكام لاعيب زمالك ؟؟ والدنيا تبوظ خالص وناس تكتب على مواقع التواصل ( يسقط منتخب مصر ) وناس تانية ( تحيا منتخب مصر ) والخناقة تبقى زي الفل بين الكل وعلى كل الفضائيات ( شوفت العصفورة ) !!

في مقابل كل هذا تجد على الجانب الأخر  نفس الأمور في جميع مناحي الحياة الأسعار الخاصة بالسلع الغذائية أصبحت ( غير طبيعية ) ومع دخول رمضان فتجد الجميع في حالة من اللهفة على اشتراء كل مستلزمات الطعام والشرب والأكل وكأننا سندخل في مجاعة فيضيع ما حدث من غلاء وسط اللهفة على الشراء ( شوفت العصفورة ) !!!

وفجأة القضاة يحصلون على مزايا اكثر مما لهم أصلا من مزايا في حين ان هناك فئة أخرى مثلا لاتقل أهمية عنهم مثل ( الأطباء ) مثلا لديهم مشاكل قد نستطيع ان نحلها بنصف ما يتحصل عليه القضاة .. ولكن نظرية ( شوفت العصفورة ) تجعلك تنظر على ما يحدث للأطباء وما يقومو به لكي تقول ( والنبي دول أطباء دول ) لتفاجأ بان اللي انت بتقول عليهم بردو ( تعليقات سلبية )  كل ما يحتاجونه ويطلبونه ( أوامر ) .. شوفت العصفورة !!

وانت تتابع مباريات الدوري وتسمع كل يوم خناقة على الحكم الفلاني او العلاني او وانت تشاهد المسلسل التافه الفلاني او العلاني ثق تماما أن  ( العصفورة ) موجود في مكان ما وهناك من يضحك في جانب الصورة وهو يقول ( شوفت العصفورة ) !!

وفجأة بقى وفي عز كل اللي بيحصل ده وكل ( العصافير اللي طايرة ديه ) يطلع المرشح السابق للرئاسة ( شفيق ) ويقلب الدنيا بكلام هنا وكلام هناك وناس من هنا ترد على كلام هناك وتلاقي الدنيا كلها بقت ( اهلي وزمالك وقضاة وشفيق ) ... شوفت العصفورة !!!!

وانا بدوري .. وبنفس الطريقة وبنفس النظرية أقول لرئيس الجمهورية .. احنا يا فندم هارشين الفيلم ده .. فلو سمحت قول للناس اللي بتعمل كده تبطل تعمل كده علشان نركز في اللي احنا فيه ... يا فندم .. احنا هارشين الليلة ... ( شوفت انت العصفورة ) !!!