من المدرج :برايز لهاني رمزي .. إنجليزي ده يا مرسي !!

شاهدت جزء من حلقة في قناة الأهلي بين شادي محمد وهاني رمزي نجم مصر السابق والمدير الفني السابق للمنتخب الأوليمبي.

في الحلقة شرح هاني رمزي بشكل ( علمي ) اه والله ( علمي ) كيف نستعد وكيف نخلق نظام كروي جيد يؤدي بنا الى بناء منتخب ( قوي ) قبل بداية عام 2018 .

ولأن كلام هاني كان كلام جيد ومحترم وعلمي فقد اهتم ( برايز ) بهذا الكلام بشكل كبير واجرى هذا الإتصال التليفوني مع
هاني رمزي بعد الحلقة مباشرة.

برايز : ايوا يا ابو هاني .. ايه الحلاوة ديه ما شاء الله عليك يا اخي .

هاني : أهلا وسهلا مين معايا

برايز : انا برايز .. اللهو الخفي في اتحاد الكرة يا هاني .

هاني : اه .. اهلا وسهلا

برايز : اهلا بيك يا حبيبي .. انا اتفرجت على البرنامج مع شادي محمد وسمعت الكلام العلمي المحترم اللي انت قلته ده بصراحة حاجة تفرح وحياة ربنا يا هاني .

هاني : طيب الحمد لله .. لو حضرتك عايزني ابعتلك اللي انا قلته مكتوب في شكل خطة عمل انا ما عنديش مانع والله .

برايز : يا سلام يا هاني هي ديه الوطنية بس هو المشكلة ان الدور مش عليك ؟؟ عارف لو الدور عليك كنت حتبقى المدير الفني لمنتخب مصر والله .

هاني : دور ايه ومدير فني ايه ؟؟ انا بقولك المانيا بتعمل ايه فممكن احنا نعمل زيهم مش مهم انا موجود او غيري موجود المهم انك تعمل الكلام ده .

برايز : طيب قشطة .. هو بص في شوية حاجات كنت مش فاهمها انا يعني انت كنت بتقول منتخبات الناشئين يتم بناءها بشكل محترم وبعدين اللعيبة يتم تصعيدها الى المنتخب الأوليمبي وانه يبقى فيه علاقة واضحة بين كل المنتخبات علشان نختار افضل اللاعبين وكل لاعيب يبقى لعب عدد كبير من المباريات الودية والدولية والكلام اللطيف ده .. هو ده بيحصل ازاي يا هاني ؟؟

هاني : بيحصل ان اتحاد الكرة حضرتك يبقى حاطط نظام واضح وبيدي المسئولية للناس التي تستحق وتمتلك الامكانيات الفنية والأخلاقية اللي تبني بيها فرق لها شخصية وتخرج منها لاعبين عندها شخصية لاعب دولي .

برايز : مش فاهم .. انجليزي ده يا هاني ؟

هاني : لا والله ده عربي .

برايز : مش مهم .. طيب هو احنا علشان نعمل كده المفروض يبقى عندنا كوادر في اتحاد الكرة نفسه صح ؟

هاني : اه طبعا

برايز : مش قلتلك .. انجليزي ده يا هاني ؟

هاني : مش فاهمك تاني .

برايز : بص يا عم هاني علشان نخلص من المكالمة المنيلة ديه الكلام اللي انت قلته ده حلو اوي واكاديمي اوي ومحتاج ناس تشتغل عليه وناس تكون فاهمة وناس تكون عندها النية للبناء وكده .. واحنا من الأخر مش حنعمل الكلام ده فبطل وجع دماغ وما تتكلمش في الكلام ده تاني .. كفاية انجليزي يا هاني !!

هاني : انجليزي ايه يا ابني انا بكلمك عربي .

برايز : لا مهو لما تقولي كلام علمي .. ومبني على قواعد ... وعايز ناس محترمة تدير اتحاد الكرة .. ومش عايز سبوبة .. ومش عايز جمعية عمومية اصوتها بنجبها بدستة كور .. وعايز ناس تفهم في الإدارة علشان تدير منظومة الكورة في مصر يبقى ده انجليزي يا هاني !!

هاني : لا يا برايز .. مش انجليزي

برايز : أمال ايه بقى ؟

أنا : ده ألماني يا روح امك ... وانتهت المكالمة عند هذا الحد .. وربنا يخليلنا برايز !!!