عندما دخلت مقصورة الصحفيين لمتابعة مباراة مصر والسنغال كان لدى إحساس غريب بأننا سنفوز بسهولة شديدة (مش عارف ليه).

ومع أول خمس دقائق من المباراة (عرفت اللي فيها) أصل شكل اللعيبة بتاعتنا بيبان كده من أولها.. بعديها بثلاث دقائق تقريبا (الشناوي) عملها فينا بشكل مستفز اوي حتى انني وكعادة جماهير المدرج عندما ترفع الكرة الى داخل منطقة الفريق الذي نشجعه هتفت( شناوووووووووووووي) يعني بقوله يطلع يمسك الكورة يعني (بس بلغة المدرج)  لكن وانا بقول الجملة كملتها (شناوي حيعملها فينا) وقد كان.

بعد الهدف لم ألتفت لأي شئ وكنت في شدة التركيز مع الشناوي لأنني كنت متأكد مليون في المائة انه لن يكمل المباراة (هي قواعد اللعبة عندنا في مصر بتقول كدة)!

وبالفعل خرج الشناوي.. المدرج بدأ يحاول تحميس اللاعبين عل وعسى ان تخرج علينا (الروح المصرية) اللي احنا بنتكلم عليها ليل ونهار ديه لما يكون فيه شئ صعب التحقيق وعايزين نحققه (لكن الروح تقريبا كانت مصطبحة) !

وبمناسبة (الإصطباحة) معلومة مؤكدة تقول ان لاعب في منتخب مصر (لاعب كبير) تم (قفشه) في فندق اقامة اللاعبين قبل الانتقال الى ملعب المباراة مباشرة وهو كان ( بيصطبح ) بجد .. اه والله .. كان بيدخن !!

اللاعب لم يلعب المباراة وكان احتياطيا .. المشكلة مش في الإصطباحة على فكرة .. المشكلة في توقيت الإصطباحة !! يعني ما ينفعش تصطبح وانت رايح تركب الباص للملعب ممكن (ترجع) !!

والدليل الأكبر على ان الروح وغيرها (كانوا مصطبحين) هو المؤتمر الصحفي بعد المباراة حيث أكد المدير الفني لمنتخب مصر ان هذه كانت أفضل مباراة لمنتخب مصر خلال الفترة الماضية (اه والمصحف قال كده)!

والأجمل بقى أن احنا لما سألنا طيب حنعمل ايه علشان ما نعملش المؤتمر الصحفي ده تاني ؟ قيل لنا بصراحة شديدة (احنا عندنا برنامج اضح ومحدد ولازم نمشي عليه حتى لو فيه جهاز فني جديد البرنامج ده هو ان احنا حنلعب 25 مباراة في السنة (اه والمصحف اتقلنا كده) !

وبالتالي خرجنا من المباراة والمؤتمر الصحفي ونحن نتسائل هو اللي احنا فيه ده كان بجد ؟؟ واللي احنا سمعناه ده حقيقي يعني ؟؟ ولا احنا كلنا  كنا مصطبحين يا كابتن !!!!

مهو ما ينفعش الأداء ده يبقى طبيعي .. والتصريحات ديه تبقى طبيعية .. والنتيجة ديه تبقى طبيعية .. والأتحاد ده يبقى طبيعي ... وان احنا كنا زي الفل امبارح ..وان احنا عندنا خطة فعلا ... وان احنا عندنا ( اتحاد كرة بيفهم في الكورة فعلا ) !! الأخيرة ديه بالذات مش ممكن تتصدق الا من خلال ( اصطباحة ) ومضروبة كمان .. اه والله مضروبة !!!